شتاء شامي

من طرف **لولية** الإثنين أبريل 05, 2010 12:39 pm

شتاء شامي

نستيقظ صباحا
نصلي و نعود الى الفراش كفراشات تحمي اجنحتها من برد السماء.
ستي الحجة تقرأ القرآن .
فيروز تبدأ بايقاظنا و نتسارع بخطى ثقيلة و انفاس باردة لكن دفء بيتنا الشامي يشرق و يعطر صباحنا .
قهوة الصباح لا يمكن تجاهلها ( دولة كبيرة و ريحة الهيل عم تفوح منها و ما بننسى نحط صحفة الفنجان عوش الدولة متل العادة لنخليها سخنة ).
مدفأة بيتنا الأجمل و الأكبر من كل منازل العالم ( بنجتمع حواليها و يا من ترى عليها اواعي منشورة غسلتن الام مبارح بتلاقي بيناتن اواعي المدرسة و على غطا الصوبيا شوية خبز محمصين من عشا مبارح ).
فطور شامي يبدأ لا يمكن استطعام الذ منه في كل العالم( مكدوس و جبنة و لبنة طبعامع رشة نعنع و زيت و زيتون )
و إبريق الشاي فوق المدفأة ينده والدتي أن ضقت ذرعاً ( بيغلي لحتى يتخمر و كل كاسة اطيب من اللي بعدها )
نستعد للذهاب للمدرسة و لا ننسى المصروف و نلبس و نغلق باب المنزل بقبلات دافئة من الوالدة الحنونة( يلا استعجلو رح يروح عليكن الباص .. سكر جاكيتك لا تاخد برد .. لا تنسى تاكل سندويشتك .. حطيتلك تفاحة بكيس نايلون )

صحن الفاكهة يعتلي الطاولة ( كرمتينا و بردقان و تفاح )
الام مشغولة بتحضير الغداء و ترنم و تتمايل على صوت فيروز .
مكالمات صباحية لا يمكن تجاهلها ( لازم تتصل تتطمن على الكل مع انو مبارح اتصلت فيهن بس الحنان و الخوف بيغلب مشاعرها ).
ساعات الظهيرة الشتائية دفئ مميز .. طاولة الغداء و الكل حولها بعد عناء و جوع لساعات ( يلا الغدا جاهز .. بتاكل صحنك كلو .. اللي بيخلص يجلي صحنو )
فترة الرسوم المتحركة و لحظات ترقب و انشداد و متابعة بالعين و الحركات الجسدية ( طبعا هدوء مو طبيعي .. اللي متسطح عالارض .. و اللي عالصوفا .. و اللي معانق امو و غفيان عحضنها )
فترة الدراسة الشامية .. اقلام و كتب و دفاتر و صراخ طفولي ممتع ..أقلام مبعثرة لطالما سألني أخي ألا تجمعيها في مقلمة .. نصف مسطرة ( طلبو مني دفتر رسم بالمدرسة .. ماما نقليني الاملاء .. رسمة درس العلوم وقت نحط الصفحة عالكتاب و نعلمها انو اسهل .. نشيد ماما ماما يا انغاما .. قلم الرصاص المبري من الطرفين )
فترة المساء الشامية .. زيارات عائلية منزلية دافئة .. ( قالب كاتو سادة .. تبولة .. عصير شراب الورد .. صحن بزر بس انتبهو لا تهرهروا )
السهرة الشامية ( مسلسل ال 9.30 .. غدا نلتقي .. الابراج )
نوم شامي مشرق بعد عشاء ممتع ( يلا عالنوم .. لا تنسى تفرشي سنانك .. دور مين اليوم بكب الزبالة .. لا تلتهو بالحكي نامو عندكن مدرسة )

و تنطفى انوار البيت الشامي
و تشرق شمس يوم دمشقي جديد
روحي معجونة فيكي ياشام